உலக சுற்றாடல் தினத்தை கொண்டாடும் முகமாகவும் இத்தினைத்தை முன்னிட்டு ஜனாதிபதி கௌரவ மைத்ரிபால சிறிசேன அவர்கள் நாடளாவிய ரீதியில் முன்னெடுக்கும் செயற்திட்டங்களுக்கு வடமாகாணத்தின் பங்களிப்பினை வழங்கும் நோக்கிலும்  கண்டி - யாழ் பிரதான வீதியான A9  வீதியின் வவுனியா தொடக்கம் இயக்கச்சி வரையான வீதியின் இருமருங்கிலும்  மரக்கன்றுகளை நாட்டும் ஆரம்ப செயற்திட்டம் கௌரவ ஆளுநர் கலாநிதி சுரேன் ராகவன் அவர்களின் தலைமையில் A9 வீதியின் மாங்குளம் 226 ஆவது மைல்கல் பிரதேசத்தில் கடந்த 05-06-2019 புதன்கிழமை முற்பகல் இடம்பெற்றது.

A9 வீதியின் குறிப்பிட்ட பகுதியினை பசுமை வீதியாக மாற்றும் ஆளுநரின் எண்ணக்கருவுக்கு அமைய இந்த மரநடுகைத் திட்டம் வடமாகாண உள்ளூராட்சி ஆணையாளர் திரு.பற்றிக் டிரஞ்சன் அவர்களின் மேற்பார்வையில் வடமாகாண விவசாய அமைச்சின் உதவியுடன் பிரதேச சபைகளின் பராமரிப்பில் இடம்பெறுவதுடன் இந்த திட்டத்தின் மாவட்ட ரீதியான நிகழ்வுகள் கிளிநொச்சி மற்றும் வவுனியா மாவட்ட செயலாளர்களின் தலைமையில் வவுனியா மற்றும் ஆனையிறவு பிரதேசங்களில் இடம்பெற்றது.

இந் நிகழ்வில் யாழ் மாநகர முதல்வர் கௌரவ இம்மானுவல் ஆனல்ட் அவர்களும் கலந்து சிறப்பித்தார்.

மேலும் இந் நிகழ்வில் யாழ் இந்தியத் துணைத்தூதுவர் எஸ்.பாலச்சந்திரன் அவர்கள், வடக்குமாகாண அவைத்தலைவர் சீ.வீ.கே சிவஞானம் அவர்கள், மாகாண உள்ளூராட்சி அமைச்சின் அதிகாரிகள், மாகாண உள்ளூராட்சி ஆணையாளர் அலுவலக உத்தியோகத்தர்கள், முல்லைத்தீவு மாவட்ட செயலர், மாவட்ட செயலக அதிகாரிகள், ஆளுநர் செயலக அதிகாரிகள், மாகாணசபையின் திணைக்களங்களின் பிரதிநிதிகள் உள்ளிட்ட பலர் கலந்து கொண்டனர். 

க.பொ.த சாதாரணதர பரீட்சை மற்றும் உயர்தரப்பரீட்சைக்கு தோற்றியவர்களுக்கு கல்வியமைச்சு புதிய இலகுவான வசதியை ஏற்படுத்திக் கொடுத்துள்ளது.


இதன்படி மேற்குறித்த பரீட்சைக்குத் தோற்றியவர்கள் அவற்றின் சான்றிதழ்களைப்பெற கொழும்பிலுள்ள பரீட்சைகள் திணைக்களத்துக்கு அலைய வேண்டிய தேவையில்லை.எதிர்வரும் ஜூன் ஆறாம் திகதி முதல் நாட்டிலுள்ள பிரதான தபாலகங்களில் குறித்த சான்றிதழ்களைப் பெற்றுக் கொள்ளலாமென கல்வியமைச்சர் அகில விராஜ் காரியவசம் தெரிவித்துள்ளார்.நாளாந்தம் இந்தச் சான்றிதழ்களைப்பெறுவதற்கு பரீட்சைகள் திணைக்களத்துக்கு 2000 பேர் வருகை தருகின்றனர்.எனவே நாட்டிலுள்ள பிரதம தபாலகங்களில், இந்த சான்றிதழ்களைப்பெறும் வகையில், கணனி வலையமைப்பு பரீட்சைகள் திணைக்களத்துடன் ஏற்படுத்தப்படவுள்ளது.எனவே, இந்தச் சான்றிதழ்கள் தேவைப்படுவோர் அதற்கான தகவல்களை வழங்கி அவற்றைப் பெற்றுக் கொள்ளலாம் என அமைச்சர் மேலும் தெரிவித்துள்ளார்.